Имрӯз, 8 март, раиси вилояти Хатлон Давлаталӣ Саид дар партави сиёсати инсондӯстонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба аёдати модари 121-сола Тураева Басимо рафтанд.
Нахуст раиси вилоят он касро ба муносибати Рӯзи Модар табрик намуда, барояшон саломативу хушбахтӣ, рӯзгори пурсаодат, хонадони ободу осуда ва тамоми хушбахтиҳои зиндагиро таманно намуданд.
Тибқи маълумоти расмӣ он кас калонсолтарин нафақахӯр ва сокини Тоҷикистон мебошад. Тураева Басимо, аз деҳаи Чашмаи Бедаки ҷамоати деҳоти Лоҳутии ноҳияи Ховалинг буда, 6 майи соли 1904 таваллуд шудааст ва ҳоло мувақатан сокини шаҳри Душанбе мебошад.
Тураева Басимо соҳиби 7 фарзанд, 4 духтар ва 3 писар, 47 набера, 138 абера ва 25 чабера мебошад. Тураева Басимо дар ноҳияи Ховалинг таваллуд шуда, сипас соли 1930 ба калхози Миралӣ Маҳмадалиеви ноҳияи Восеъ мекӯчад. Дар ноҳияи Восеъ бо шавҳараш солҳои дароз ҳамчун калхозчии одӣ кор мекунад.
Солҳои 1985-1990 боз ба деҳаи Чашмаи Бедаки ноҳияи Ховалинг кӯчида, идомаи зиндагиро он ҷо ихтиёр мекунад. Шавҳараш соли 1985 вафот кардааст.
Раиси вилоят Давлаталӣ Саид бо модар суҳбати самимӣ намуда, бо вазъи зиндагии эшон ва таърихномаи зиндагии он кас шинос шуданд.
Гуфта шуд, ки дар сатҳи давлатӣ бо шукӯҳи хосса ҷашн гирифтани Рӯзи Модар нишонаи таваҷҷӯҳ ва эҳтироми хоссаи Ҳукумати кишвар нисбат ба занон мебошад, зеро нақши занону бонувон ҳамчун нерӯи бузургу созанда дар ободии хонадон, тарбияи фарзандон ва дар ниҳоди онҳо парвариши эҳсоси баланди ифтихори ватандорӣ беназир аст.
Ҳоло дар вилояти Хатлон 92 нафар модари нафақагири аз 100-сола боло зиндагӣ мекунанд. Ҳамчунин, дар вилоят 17 нафар марди нафақагири аз 100-сола боло умр ба сар мебаранд, ки аз 100 то 106 сол умр доранд.
Ҳамасола дар арафаи ҳар иду ҷашнҳо ин модарони табаррук аз ҷониби раиси вилоят ва мақомотҳои маҳаллӣ аёдат карда шуда, ба онҳо туҳфаҳои молию пулӣ тақдим карда мешавад.
Хадамоти матбуоти раиси вилояти Хатлон