Имрӯз, 28 март, дар толори Кохи фарҳанги шаҳри Бохтар таҳти раёсати раиси вилояти Хатлон Давлаталӣ Саид ҷаласаи корӣ баргузор гардид.
Дар ҷаласаи корӣ муовинони раиси вилоят, роҳбари дастгоҳ, қисман роҳбарони ташкилоту муассисаҳои давлатии вилоятӣ ва раисони шаҳру навоҳӣ иштирок намуданд.
Дар ҷаласаи корӣ аз ҷониби раиси вилоят аз масъулони ташкилоту муассисаҳои вилоятӣ ва раисони шаҳру ноҳияҳо вобаста ба масъалаҳои мубрами давлатӣ ва хизматӣ пурсиш ба амал оварда шуда, оид ба ҳалли онҳо дастуру супоришҳо дода шуд.
Давлаталӣ Саид, раиси вилоят масъалаҳои ҷамъбасти натиҷаҳои рушди иқтисодию иҷтимоӣ дар семоҳаи аввали соли 2025, соҳаи кишоварзӣ, аз ҷумла гузаронидани ченаки назоратии кишти картошка ва таъмини дурнамои кишти он, интихоби тухмии босифати ҳама намуди маҳсулоти кишоварзӣ, мубориза бар зидди малах, соҳаи саноат, талафоти неруи барқ, ҷамъоварии маблағи неруи барқ, таъмини нақшаи маҷмуи андозҳо, вусъат бахшидани омодагии ҷавонон ба даъвати баҳорӣ ва сафарбар намудани онҳо ба сафи Қувваҳои Мусаллаҳ, нақшаи чорабиниҳо бахшида ба 35-солагии Истиқлоли давлатӣ, сохтмон ва сифати иншооти ҷашниро мавриди таҳлилу баррасӣ қарор дода, ба раисони шаҳру навоҳӣ ва роҳбарони сохторҳои марбутаи вилоятӣ бо истифода аз имконияту захираҳои мавҷуда барои бартараф кардани камбудиву норасоиҳо дастуру супоришҳои мушаххас доданд.
Таъкид гардид, ки барои истифодаи самараноки заминҳои кишт, баланд бардоштани ҳосилхезии онҳо, таъмин намудани хоҷагиҳои кишоварзӣ бо тухмии баландсифати зироатҳои кишоварзӣ, бахусус, пахта ва ғалладонагиҳо ва зиёд кардани ҳаҷми истеҳсоли маҳсулоти кишоварзӣ тадбирҳои иловагӣ андешида шавад.
Инчунин, муовини якум, муовинон ва роҳбари дастгоҳи раиси вилоят, раисони шаҳру навоҳӣ ва роҳбарони ташкилоту муассисаҳои вилоят вазифадор гардиданд, ки дар давраи ҳисоботӣ ба нишондиҳандаҳои оморӣ диққати зарурӣ дода, аз тамоми имконият ва захираю иқтидорҳо истифода карда, натиҷаҳои рушди иқтисодию иҷтимоӣ дар семоҳаи аввалро бо нишондиҳандаҳои мусбӣ ҷамъбаст ва саривақт пешниҳод намоянд.
Супоришҳо ҳамчунин оид ба ташкили саривақтӣ ва босифати кишту кори баҳорӣ, махсусан пахта ва картошка, иҷрои супоришҳои Паёми Президенти Ҷумҳурии Тоҷикистон ба Маҷлиси Олӣ, вусъати сабзкорӣ ва созандагӣ дар иншооти ҷашнии 35-солагии Истиқлоли давлатӣ дода шуд.
Хадамоти матбуоти раиси вилояти Хатлон
