Ҳамасола рӯзи 14 феврал ҳамчун Рӯзи байналмилалии ҳадяи китоб дар ҷаҳон таҷлил карда мешавад.
Ба ин муносибат имрӯз аз ҷониби роҳбарияти Муассисаи давлатии Китобхонаи оммавии вилояти Хатлон ба номи Шамсиддин Шоҳин ба раиси вилояти Хатлон Давлаталӣ Саид як баста китоб ҳадя гардид.
Раиси вилоят ба ин масъала таваҷҷӯҳи махсус дошта, маҳз бо пешниҳоди он кас қарори Маҷлиси вакилони халқи вилояти Хатлон аз 12 декабри соли 2024, таҳти №720 ба тасвиб расид ва соли 2025 дар қаламрави вилояти Хатлон “Соли фарҳанги китобхонӣ” эълон гардид.
Дар Ҷумҳурии Тоҷикистон ин низ ин анъана таърихи тӯлонӣ дошта, ҳадяи китоб ба таври оммавӣ бо ташаббуси наҷиби Пешвои муаззами миллат дар солҳои соҳибистиқлолӣ рӯи кор омад.
Китоби «Тоҷикон» аз номи Пешвои муаззами миллат ба ҳар хонадон ҳадя гардид ва дар ояндаи наздик низ “Шоҳнома”-и Ҳаким Фирдавсӣ ройгон ба ҳар як хонавода ҳадя хоҳад гашт.
Хадамоти матбуоти раиси вилояти Хатлон
