Имрӯз, 1 октябр, Сарвазири мамлакат Қоҳир Расулзода ва раиси вилояти Хатлон Давлаталӣ Саид зимни сафари корӣ дар деҳаи Устокорони ҷамоати деҳоти Пахтаободи ноҳияи Шаҳритус муассисаи таҳсилоти миёнаи умумии №18-ро мавриди баҳрабардорӣ қарор доданд.
Иттилоъ дода шуд, ки иншооти мазкур дар доираи нақшаи чорабиниҳо бахшида ба ҷашни 35-солагии Истиқлоли давлатии Ҷумҳурии Тоҷикистон бо усули муосири меъморӣ сохта шудааст.
Бинои мазкур дуошёна буда, масоҳати умумии он 3,60 гектарро ташкил менамояд. Дар иншооти нав ҳамчунин утоқҳои кории директори муассиса, омӯзгорон ва синфхонаҳои фаннӣ ҷойгир карда шудаанд.
Фармоишгари бинои муассисаи таҳсилоти миёнаи умумии №18 Вазорати маориф ва илми Ҷумҳурии Тоҷикистон буда, мувофиқи нақша корҳои сохтмонӣ соли 2022 оғоз гардида, соли 2024 бо маблағи 5879353 сомонӣ бо сифати баланд сохта шудааст.
Дар рафти корҳои сохтмонӣ аз 15 то 20 нафар сокинони маҳалӣ ба кор ва бо маоши хуб таъмин гардидаанд. Баъди ба истифода дода шудани иншооти мазкур бо 480 ҷойи нишаст дар 2 баст хонандагон ба таълим фаро гирифта мешаванд.
Бо назардошти сол аз сол зиёд гардидани шумораи хонандагон ва пайдо гардидани талабот ба ҷои нишаст, соҳибкорони маҳаллӣ, ки хатмкардаҳои ҳамин муассиса мебошанд, бо ҷонибдорӣ аз сиёсати ободгаронаи Ҳукумати мамлакат тасмим гирифтанд, ки бинои нави таълимӣ созанд.
Сарвазири мамлакат Қоҳир Расулзода зимни суҳбат бо омӯзгорону хонандагон таъкид намуданд, ки ба омӯзиши забонҳои хориҷӣ диққати ҷиддӣ дода, насли наврасро дар рӯҳияи ватандӯстиву ифтихори миллӣ тарбия намоянд.
Хонандагон ва омӯзгорон аз чунин туҳфаи зебо изҳори миннатдорӣ намуда, ваъда доданд, ки сипосгузории хешро ба Пешвои миллат расониданд.
Бояд зикр намуд, ки дар соли 2023 дар шаҳру ноҳияҳои вилоят 95 муассисаи таҳсилоти умумӣ ба маблағи зиёда аз 260 миллион сомонӣ барои 17402 ҷойи нишаст ва 8 моҳи соли 2024 аз ҳисоби ҳамаи сарчашмаҳои маблағгузорӣ 32 адад иншооти соҳаи маориф бо шумораи 213 адад синфхона барои 10650 ҷойи нишаст дар ду баст ба маблағи зиёда аз 60 миллион сомонӣ бунёд, таъмир ва азнавсозӣ шуда, ба хонандагон шароити мусоиди таълим таъмин карда шуд.
Хадамоти матбуоти раиси вилояти Хатлон
