Маъруф Қаюмов, сокини ноҳияи Ҷайҳуни вилояти Хатлон ҳосили сеюми дарахтони бананро имсол мечинад. Ду соли ахир аст, ки хонаводаашро бо ин навъи мева таъмин менамояд.
Дарахтонро аз Ӯзбекистон барои таҷриба оварда буд. Вале талошҳояш натиҷа дод.
Ӯ чандон бовар надошт, ки чунин навъи мева ба иқлими инҷо тобовар буда, ҳосил мебандад. Аз шаҳри Тошкенти Узбекистон 20 адад ниҳол овард.
Ҷайҳун аз ноҳияҳои пешсаф дар самти истеҳсоли лиму дар вилояти Хатлон аст, ки ҳамасола аз ин ноҳия даҳҳо тон лимуи хушсифат истеҳсол шуда, ба хориҷ содир мегардад. Маъруф мехоҳад парвариши меваҳои тропикиро дар мамлакат бештар намояд. Ӯ на танҳо банан, балки меваи африқоии папая низ парвариш кардааст.
Ба гуфтаи Маъруф, дарахти банан дар гармхона парвариш мешавад. Дар сардиҳои зимистон ҳарорати гармхона 28 дараҷа рӯзона ва 18 дараҷа шабона гарм нигоҳ дошта шавад. Дарахти банан дар як сол 3 -4 маротиба ҳосил медиҳад. Дар гармхонаи ӯ ду навъи банан, бананҳои ҳаҷман калон ва хурд, парвариш мешавад, ки ҳар як дарахт то 200 дона банан мегирад.
Сарчашма: https://www.facebook.com/JOMTajikistan/videos/807437514840248
